Бесплатный фрагмент - Баппай берашта

Садовш латтар.

Дийнахьа лаьтта й1овхал д1а а яьнна, сапарг1ата сайре хьат1аера. Дийна мел долча х1аман самукъадаьлар.

Баьцаш а оакхарий а дувша кийчлуш дар. Мозий ц1оз, массаза санна, арадаьлар ший балха. Х1аьта къаьнача баппас къамаьл де лаьрх1ар ший ви1ий берашца — баппилгашца.

— Хьалхарча баппаша оалаш дар: сага вахаре керттерадар — бокъо хилар да шийна ловча оаг1орахьара боаг1ача михаца д1аваха. Керттерадар — уллув даи нанеи хилар да.

Баппилгаш цецъяьнна шоайла б1арахьажар.

— Дада, даи нанеи уллув хилар керттера х1анад? — хаьттар цхьан баппилго.

— Доккха хилча кхетаргда шо, — аьлар даь-дас.

«Кхетадиц х1анз а, з1амига ба», — аьнна хийттар къаьнача баппайна, т1аккха аьлар: «1одувша! Ха яхай».

З1амигача баппилга керта чу латтар воккхача сага аьннар, цунах уйла еш, тхьовсалацар из:

— Дада, хьадувцал, хьадувцал хьайна 1айха дийцар! Фу яхилга да из? Хьадувцал хьайна из хьаькъале къамаьл!

— Хьаькъале дий-те из? — аьлар баппас, ше-шийца оалаш санна, б1арг хьа а ца белаш.

— Хьадувций 1а? — сацацар баппилг.

— Диканд. Ладувг1алахь, — аьнна, сих а ца луш, волавелар воккха саг.

Цхьан хозача баь т1а яхаш хиннай баппаш. Уж догц1ена кхолламаш, шоашта ц1ена фо а долаш,, мел эша наьна-маьлха й1овхал а йолаш яхаш хиннай.

Тушол-бетта, лоа дашашехь хьалъара а яьнна лаьтта к1алхара, шоашта мерза дуне дуаш яр уж. Уж хоза хеташ, царна б1арахьежар оакхарий, оалхазараш, юхег1олла т1ех мел воалар.

Озаенна маьлхага кхача г1ерташ санна латтар уж, дерригача дуненга елаенна, вахара раьза йолаш, даьла денна г1адъяха йолаш. Х1ара 1уйранна малха духьала айлора уж, шоай безаме йовхьамаш цунга аййора цар.

Х1ара 1уйранна маьлха хьалххарча з1анарашца сомаяьле, мерза озаялий, шоай 1ажаг1а кийнаш т1атохкар баппаша.

Сарахьа шоаш тхьовсаш, лелаш, ловзаш, удаш, текхаш, г1етташ мел йолча х1аман бийса даькъала ювцар цар.

Иштта д1аухар денош. Тушол-бетта шийла, ц1ена фо д1а а даьнна, ена хьаэттар бекарг-бетта й1овхал.

З1амига баппилгаш йоккха хилар. Боккхийчар деча тайпа къамаьлаш а деш, шо-шоай дезал а болаш бар уж х1анз.

Ена хьаэттар ахкан й1овхал, цунца цхьана дера керда вахар — з1амига баппилгаш.

Т1аккха бера ахкан шоллаг1а бола бутт, шийца ла мА могга й1овхал а яхьаш. Эггара ч1оаг1аг1а цу бетта раьза хиннар бар Малх. Х1анз ший еррига наьнаяр санна йола й1овхал яла йиш яр цун ше мел долча х1аманна, марх1акъувла йиш яр цун са чудоаллаш а ца доаллаш а мел дола х1ама, из кхоача ца луш бола безам мехкабеш лаьттан т1а. Баппаш зувцар уж 1аламан хувцамаш. Уж шоай берех йоахкаш яр чуийнна. Берашка д1адувца дезаш дар вахарах лаьца, лорале везаш долча х1амах лаьца, лоалахой ларх1а безарах, кхы а дуккха шоашта мел ховш дола х1ама д1ахьеха дезаш дар царна.